達明一派為慶祝入行25周年，相隔8年於4月20至22日再踏紅館舉行演唱會，反目多年又突然做番朋友，全因一個「錢」字，兩人接受本報獨家專訪期間，大爆當年不和後又復合的來龍去脈，明哥左一句「當年我好小朋友，誤會唔好再講。」阿達右一句「咁大年紀乜都睇化。」兩位年近半百的朋友談及多年的恩怨，表面不計前嫌，實際句句夭心夭肺，兩人拳來腳往，話中有話，跟特首候選人每日出招一樣精采。
達明一派於91年解散，當年明哥曾說：「達明成立第一年已發覺大家好唔夾，所以唯有喺唔同音樂風格中搵出共同音樂空間去擦出火花。」同牀異夢始終不長久，其後在十周年、二十周年之際達明曾復合過兩次，但06年那次，讓達明之間的隔閡更為嚴重，演唱會結束後，兩人再次分道揚鑣 ，是預計得到的不相往來。皆因阿達曾公開表達不滿，稱他永遠活在明哥的影子下，亦不滿意《石頭記》被收入黃耀明的個人精選碟《我愛明歌》中，更向傳媒大吐苦水，指當年商台宣佈請軟硬與達明演出，開會卻沒他份，埋怨不受尊重。
6年無聯絡
整整6年，達明完全零接觸，直至去年信主後的阿達主動聯絡，加上明哥身邊人不斷提醒要為達明25周年做啲嘢，達明一致通過決定開Show搞大佢。問到久別重逢，是否百般滋味在心頭？明哥一貫答得滋油：「無陌生感覺，都識咗咁多年啦。」阿達附和：「係啦，我都知佢脾性，除非鬼上身嘅啫。」那早已和解了嗎？阿達搶答：「無。」但明哥懶理：「和解好耐啦，今日坐得埋一齊，算數啦，都咁大個人，人生要豁達啲，唔好計埋芝麻綠豆嘅事，做人要體諒，早年我哋已經傾，有啲矛盾解決咗。」對明哥言論，阿達全程O嘴，有口難言。
達明話中話
問到今次復出是否主要為搵真銀？阿達答到坦白：「可以咁講嘅，亦好希望一齊做落去，可以做埋世界巡迴Show。」問到當年不和原因，明哥欲言又止：「過去咗唔想講，總之係誤會，大人有大量，我當年好小朋友。」聽畢明哥回答，阿達想了一想：「無介意，咁大年紀乜都睇化，家好開心，當兩個老友出玩音樂，好Enjoy呢種感覺，事實多過一個人就會有是非。」對阿達的「老友論」，明哥有點抗拒還有所暗示：「唔可以話我哋好啱，我哋無一齊玩，做嘢各有各，等於好朋友未必做到好嘅同事。總之誤會嘅嘢唔好再講，再講就溝通唔到。」
MakeUp:Cathy Lau@Colour Corner
Hair:Ivan Lee@Headquarter
Wardrobe:Adidas、Full Stop T-Shirt Concept Store
Location:IL CAFF'E----------------------------------------------------
想得到最新既資訊, 請like我既facebook page!
我們都是聽粵語流行曲長大的 | Promote your Page too
沒有留言:
張貼留言